Normas de publicación d'a Revista de l'Academia Aragonesa de la Lengua (RAAL)

I. Articlos

Los textos habrán d’estar orichinals y ineditos, y habrán d’atener-se a la orientación d’a Revista de l’Academia Aragonesa de la Lengua (RAAL). Si un estudio u treballo ha recibiu financiación pa la suya realización, se’n fará mención en una nota inicial.

Extensión

La extensión no habrá de superar los 50 000 carácters (equivalent a 30 folios en Times New Roman 12 a espacio y meyo).

Formato

Los orichinals se presentarán en suporte dichital, preferiblement en formato de texto MS Word; antiparte, caldrá ninviar tamién lo texto en formato PDF (con os signos tipograficos integraus). Asinas mesmo, se remitirá una tercer versión en PDF an s’habrán eliminau los datos d’autoría y afiliación, pa que pueda emplegar-se en o proceso d’avaluación. En esta versión pa l’avaluación cal evitar los comentarios, las citacions internas y las referencias bibliograficas que permitan identificar l’autoría de l’articlo.

Si s’incluyen graficos u tablas, caldrá elaborar-los con un programa de procesamiento de texto u bien s’adchuntarán en un fichero grafico. Las figuras, cuadros y fotografías se presentarán en suporte informatico, acompañadas d’o piet explicativo, numeradas correlativament, y s’indicará —si no son introducidas en o cuerpo d’o treballo— lo puesto exacto d’a suya aparición. Tamién se i fará constar la fuent, propia u allena.

Los textos s’habrán d’achustar a estas normas de presentación y tamién a la normativa d’a luenga en que sigan escritos. Si no se cumplen, lo Comité de Redacción podrá refusar-los u demandar-ne una versión revisada. Tamién se demanda a las autoras y autors que s’aseguren d’una buena redacción y d’un luengache respetuoso, inclusivo y igualitario.

La maquetación será a cargo d’a revista, lo cual implica que no se i han d’incluyir encabezaus, partición de parolas a la fin de linia u espacios sistematicos que no vaigan fixaus con tabuladors. Las notas s’incluyirán a piet de pachina, numeradas correlativament, y nomás s’usarán pa aportar información adicional.

Lo texto irá encabezau con o títol, lo nombre de l’autor/a u autors, la filiación academica u institución, l’adreza de correu electronico y, si se tien, lo codigo ORCID. Tot seguiu s’incorporará un resumen de 750 a 1 000 caracteres (espacios incluyius) y hasta 7 parolas clau.

División d’os articlos

Si l’articlo ye subdividiu per apartaus, cal fer servir lo sistema decimal (1, 1.1, 1.1.1, etc.). Los títols d’os epigrafes u subepigrafes han d’ir en letra redonda normal, con una linia de separación antes y dimpués. No s’usarán mas de tres dichitos en a numeración. Ye convenient fer referencia en o texto a las ilustracions, diagramas u tablas que fagan parte de l’articlo, y numerar-las correctament.

Bibliografía

La bibliografía irá a la fin d’o texto y habrá de seguir los modelos siguients. Cuan la referencia tienga un DOI u una URL, caldrá indicar-lo; en o caso d’as URL, s’i anyadirá la data de consulta.

Monografías

Tomás, Guillermo (2020): El aragonés medieval. Lengua y estado en el reino de Aragón. Zaragoza: Prensas de la Universidad de Zaragoza.

Wheeler, Max W.; Yates, Alan; Dols, Nicolau (1999): Catalan. A comprehensive grammar. London / New York: Routledge.

Articlos

Vázquez, Jesús (2004): “Notas sobre aragonesismos atestiguados en un documento notarial tensino de 1628 y en una copia posterior”. Alazet, 16, 181–246.

Capítols de libro

Ibarretxe-Antuñano, Iraide; Hijazo-Gascón, Alberto; Moret-Oliver, María Teresa (2017): “The importance of minority languages in motion event typology: The case of Aragonese and Catalan”. En Ibarretxe-Antuñano, Iraide (ed.): Motion and Space across languages and applications. Amsterdam / Philadelphia: John Benjamins Publishing Company, 123–149.

Documentos en o ret

CICA = Torruella, Joan; Pérez Saldanya, Manuel; Martines, Josep (dirs.). Corpus Informatitzat del Català Antic. http://www.cica.cat/index.php [consulta: 04.05.2023].

DARA = Gobierno de Aragón (ed.): Documentos y Archivos de Aragón. http://dara.aragon.es/opac/app/simple [consulta: 04.05.2023].

Institut d’Estudis Catalans (ed.): Corpus Textual Informatitzat de la Llengua Catalana. http://www.ctilc.iec.cat [consulta: 15.10.2023].

Referencias internas

S’han d’incluyir en o cuerpo de l’articlo y seguir lo sistema autor/a–anyo–pachina, sin coma entre l’apelliu y l’anyo. Eixemplo: “L’onomàstica es fa present en tots els gèneres de la literatura popular (Quintana 2007: 264)”.

Citas

Las citas breus van entre cometas en o texto. Si son mas largas, habrán d’apareixer en paragrafo apartau, sin cometas, en Times New Roman 10. Las elisions se sinyalarán con tres puntos entre gafez.

Notas

Las notas criticas han d’amaneixer a piet de pachina, en Times New Roman 10, y reservar-se pa explicacions u aclaracions complementarias. Si coinciden con un signo ortografico, la clamada se plazará dimpués d’ell.

II. Resenyas

Las resenyas habrán d’estar treballos orichinals no publicaus ni totalment ni parcialment en atro medio ni en atra luenga. Se recomienda que no sigan purament descriptivas y que sitúen la obra y l’autor u autora en o marco d’a suya investigación.

Extensión y forma

La extensión maxima será de 15 000 carácters (espacios incluyius). S’han d’achustar a estas normas y a la normativa d’a luenga en que sigan escritas. S’han d’enviar en formato MS Word y PDF.

Lo texto ha d’empecipiar con a ficha bibliografica d’o libro resenyau: nombre de l’autor/a, títol (en cursiva), ciudat, editorial, anyo, pachinas totals e ISBN.

Eixemplo: Carme Junyent, El futur del català depèn de tu, Barcelona, La Campana, 2020, 144 p., ISBN: 978-84-168-6375-4.

A la fin d’o texto se consignará lo nombre y los apellius de qui sinya la resenya, la institución academica y la suya adreza de correu electronico.

III. Indicacions organizativas

La recepción de propuestas se confirmará per correu electronico tan prieto como siga posible. Lo texto será asignau a un miembro d’o comité editorial, qui comprobará la suya adecuación y lo ninviará a un minimo de dos expertos. La decisión editorial podrá estar:

Aceptación sin cambios de conteniu, comunicando lo número d’a revista an se publicará.
Aceptación dimpués d’una revisión, comunicando las modificacions proposadas per los avaluadors.
No aceptación, explicando los motivos y los comentarios anónimos d’os avaluadors.

Preparación d’os textos

La redacción ninviará las galeradas en PDF y se reserva lo dreito a fer cambios lingüisticos, estilisticos u formals, informando-ne a l’autor/a en o momento de ninviar-le las galeradas.

Idiomas

Las luengas marcos d’a revista son l’aragonés y lo catalán. Tamién s’aceptarán articlos y resenyas en atras luengas romanicas y en anglés.

Propiedat intelectual

L’autor/a ha d’estar lo titular lechitimo d’os dreitos d’explotación, incluyius los d’imáchens, tablas, graficos u atros materials complementarios.

Copyright

L’autor/a cede a la revista los dreitos d’explotación (reproducción, distribución y comunicación publica) tanto pa la edición impresa como pa la versión electronica. Los treballos publicaus se troban baixo una licencia Creative Commons Reconoiximiento - NoComercial - SinObraDerivada 4.0.

Difusión

La revista anima a los autors y autoras a difundir los suyos articlos en pachinas personals, repostes institucionals u rez socials, preferiblement con vinclo a la pachina web oficial d’a revista.

Declaración de privacidat

Las adrezas electronicas y los nombres introducius en la revista s’emplegarán nomás pa los fins declaraus y no serán disponibles pa atros propositos.

Adreza d’a redacción

Revista de l’Academia Aragonesa de la Lengua (RAAL)
Edificio “Rosa Arjó”
C/ San Antonio Abad, 38, 50010 Zaragoza
revistas@academiaaragonesadelalengua.org